19 лютага, Мінск /Кар. БЕЛТА/. Пра гатоўнасць да выбарчага працэсу,
конкурс сярод кандыдатаў у дэпутаты і адказны падыход да выбару ў эфіры
тэлеканала "Беларусь 1" расказаў старшыня Цэнтральнай выбарчай камісіі
Ігар Карпенка, паведамляе БЕЛТА.
У
адзіны дзень галасавання грамадзянам Беларусі трэба выбраць больш за 12
тыс. дэпутатаў у мясцовыя Саветы і 110 - у парламент. Як адзначыў
кіраўнік ЦВК, сярод кандыдатаў склаўся пэўны конкурс. "У Палату
прадстаўнікоў прэтэндуюць 265 кандыдатаў на 110 месцаў. Сярэдні конкурс
складае 2,4 чалавека на месца. Ёсць акругі, дзе не толькі па два, але і
па тры чалавекі прэтэндуюць на месца ў парламенце. У мясцовыя Саветы
прэтэндуюць больш за 18 тыс. чалавек, гэта прыкладна 1,5 чалавека на
месца. Але тут таксама трэба разумець: у абласныя Саветы, Мінскі
гарадскі Савет конкурс будзе крыху вышэйшы, чым, дапусцім, у раённыя
Саветы", - расказаў ён.
Ігар Карпенка дадаў, што ёсць выпадкі,
дзе ёсць безальтэрнатыўны кандыдат. Такія сітуацыі датычацца сельскіх
або пасялковых Саветаў. "Жыхары таго ці іншага пасёлка, сельскага
населенага пункта, як правіла, выбіраюць дэпутатаў, якіх самі ведаюць,
якіх самі вылучалі, якія непасрэдна там жывуць. І, як правіла, яны
безальтэрнатыўна такіх кандыдатаў у дэпутаты падтрымліваюць на выбарах",
- адзначыў ён.
Расказаў кіраўнік ЦВК і пра кандыдатаў у дэпутаты
ад партый. "Больш за 76 працэнтаў кандыдатаў у дэпутаты - партыйныя. А
вось у мясцовыя Саветы крыху больш за адну трэць кандыдатаў людзі
партыйныя. І гэта таксама зразумела. Таму што палітычныя партыі, якія
ставяць за мэту прыйсці ва ўладу, імкнуцца трапіць у парламент. Таму што
парламент будзе вызначаць законы, па якіх мы будзем жыць, будзе
вызначаць, у тым ліку ўдзельнічаць у вызначэнні стратэгічных напрамкаў
развіцця нашай краіны. Таму што парламентарыі ў поўным складзе будуць
уваходзіць ва Усебеларускі народны сход, будуць дэлегатамі УНС. І будуць
зацвярджаць Канцэпцыю нацыянальнай бяспекі, стратэгію развіцця нашай
дзяржавы на далёкую перспектыву", - падкрэсліў ён.
З'яўленне
адзінага дня галасавання ў Беларусі - гэта не толькі зручны фармат для
грамадзян краіны, але і сур'ёзная эканомія для дзяржавы. "Аб'ядноўваючы
дзве кампаніі, парламенцкую і ў мясцовыя Саветы, мы эканомім за кошт
таго, што ў нас фарміруецца крыху менш камісій, з'явілася менш выбарчых
акруг, асабліва па сельскіх Саветах. Калі раней па сельскіх Саветах
фарміравалася не менш за 11 акруг, гэта ніжняя лічба, то цяпер гэта 5", -
дадаў Ігар Карпенка.
