Месцазнаходжанне: в. Вялікае Падлессе Ляхавіцкага раена.
Пабудавана ў другой палове XVIII ст. Царква выканана з дрэва на месцы драўлянага храма 1637 года, узведзенага на фундацыі мсціслаўскага ваяводы Георгія Сапегі.
Архітэктура храма вызначаецца прастатой і лаканічнасцю, рысамі народнага драўлянага дойлідства. Мае традыцыйную для праваслаўных храмаў аб'ёмна-прасторавую кампазіцыю.
У 1879 годзе у царкве быў пабудаваны трох’ярусны іканастас, які ўпрыгожвалі 7 абразоў старадаўняга і 5 абразоў больш позняга пісьма. Ёсць меркаванні, што выкананы яны былі мясцовымі майстрамі. Жыхарамі вёскі ўшаноўваецца цудатворны абраз «Маці Божая». Мясцовая легенда расказвае, нібыта абраз з’явіўся на камні, што ляжаў каля прыдарожнага крыжа па дарозе Падлессе–Зарытава. Знайшла яго сляпая ад нараджэння дзяўчына. Камень, нібыта надзелены звышнатуральнымі, лекавымі ўласцівасцямі, мае сваю доўгую, міфічную гісторыю. На сённяшні дзень ён захоўваецца пад алтаром царквы.
